دجاج سويسرول وجزيره

السلام عليكم ورحمه الله وبركاته
جبتلكم اليوم سويسرول الدجاج اللي يديروا فيه في المناسبات
شن يحسابونا كان مش في ليبيا مانحتفلوش بروحنا ولا مانكلوشي ؟
ولا يهمكم ديروه يجي زيه بالضبط واحلى

يلا نجو للمفادير : تاخدي لحم دجاج هبرا تفرميه في الماكينه ولا تشريه مفروم كان في بعد ماتغسليه وتصفيه اتبليه باللي عندك درتله فلفل اسود وملح وحرارات وزنجبيل وقرفه مرحيه وبشره عليه تومه
زي ما في الصورة توا





نجو للحشو لحمم مفروم اطيبيه عادي زي الكيمه مع بصل او بصل اخضر وفلفل اسود مملح وشويه زيت مش هلبه وتخليه لين ينشف



زدت عليهم خديت جزر مربعات مطبوخ وحبوب دره وبازلياءمطبوخه مش لازم غير انا ندير في الجو
المهم توا نجو للطريقه:ت تفرشي ورقه سلفر وتحطي عليها طبقه من خليط الدجاج وتيساويه بيدك زي المستطيل وبعدين تحطي فوقه طبقه تانيه من خليط المفروم وترشي عليه الخضره اللي طبختيها واللي قلتلك مش لازم منها وتبدي تلفي بالشويه زي السويسرول وتقيمي في السلفر من الحواشي باش يساعدك في اللف وبعدين تسكري عليه السلفر يعني تلفيه لفان وشني تحطيف في الكسكاس وتبوخيه تبويخ يعني يطيب على البخار يقعد حوالي ساعه الا ربع وبعدين تفتحي عليه ويكون منظره زي توا



خلاص هكي طاب تقصيه دوائر وتقدميه لكن انا ماهو قلتلكم اندير في الجو ناخده ونحمره في الطاوة في شوية زيت باش يبان متحمر طبعا قبل مانقصه
في الحالتين عادي
وهذا منظره بعد ماقصيته



هذه صوره اقرب



وصحتين

وهذه وصفه تانيه باختصار لام الحلوين ماهو تحب الدجاج زيني
اسمها جزيره الدجاج
تاخدي صدر دجاج وتقصيه شرائح رقيقه مش غليظه هلبه وتبليه بالتوابل اللي تحبيها وماتقصريش معاه كل ما كانت متنوعه احسن وتبشري عليه راس بصل وتومه
وتخليه اطول وقت ممكن بعدين تستفيه في طاجين مدهون
وتكوني موتيه على غير طريق بطاطا مقليه مربعات صغيره وزيتون شرائح وجزر مربعات مطبوخ ومربعات طماطم اخضر ومربعات فلفل حلو يديروا حتى في البيض المطبوخ مربعات انا مادرتاش
تخلطيهم مع بعض وتحطي شويه منهم على كل شريحه وتاخدي جبنه مبشورة تخلطيها بالدقيق وترشيه على الخليط اللي على شريحه الدجاج
وادخليه للكوشه لين يتحمر وهو يطيب بسرعه مايخدش وقت لين تنشف اميته وصحتين



وهذه صورة قريبه اكثر باش نزيد نسهفك وماتقوليش شريره



وصحتين

ماشاااااااااااء الله عليك راجعه راجعه

مازال مقريت شئ غير شفت الصور اتسهفت

راجعتلك

ههههههههههههه
ولي ولي
نستنى فيك

والله تسلم ايديك شكله ايهبل والدجاج مش غير نحبه نموت فيه وغضوا نجربها الطريقة ههههههههههههههههه
على فكرة جربت الشاورما ومش قادرة نستنا ههههههههههههههه
وهادي صورته
ا


وهذا من داخل طرف ولدي من غير هريسة ههههههههههههه

سلمها يا ربي الفالحه الجعانه هههههههههههه
يسلمووا يديك قنين منظرها يعطيك الصحه
ان شاء الله يا رب تعجبك وتدعيلي اني نحمل ويعوضني ربي خير
هذه احلى دعوه
حتى انا زيك نحب الدجاج ونحب نتفنن فيه
صحتين على قلبك حبوبه
عليك انتي راهو ههههههههه

ما شاء الله عليك يا سارهمو
فالحة كل اطباقك حلوة تو انجرب طريقة السويسرول لانها فختلفة شوي عن طريقتي
والجزيرة قبل مجربتهاش تبدو خطيرة

ما شاء الله عليك الجزيره ندير فيها راجلي يحبها

والسويرول اني طريقتي مختلفه عليك شويه يعني نحشي فيه بالخضره بس من غبر مفروم توا ان شاء الله نجرب طريقتك

مشكوره يا عسل وان شاء الله ربي يرزقك بالحمل الثابت عاجلا غير اجل

ان شاء الله تحملي وتجيبي وتفرحي بيه مش كان حملتي والا جبت معاش تخشي المنتدى وتعطينا اطباق حلوة ههههههههههههههههههه
ربي يناولك اللي في بالك يارب

سلمت يداك

دنيا المحبة كتب:

ما شاء الله عليك يا سارهمو
فالحة كل اطباقك حلوة تو انجرب طريقة السويسرول لانها فختلفة شوي عن طريقتي
والجزيرة قبل مجربتهاش تبدو خطيرة

الله يسلمك يا رب

صح والله كل اكله وتلقيلها اكثر من طريقه والواحد يجرب

جربيها الجزيره ويا رب تعجبك
وماتندميش ههههههههههه
لالا انبصر مش حتقدري تغمضي عينيك

حبوبه كتب:

ما شاء الله عليك الجزيره ندير فيها راجلي يحبها

والسويرول اني طريقتي مختلفه عليك شويه يعني نحشي فيه بالخضره بس من غبر مفروم توا ان شاء الله نجرب طريقتك

مشكوره يا عسل وان شاء الله ربي يرزقك بالحمل الثابت عاجلا غير اجل

ايه جربيها انشاء الله
الشكر ليك حبوبة
وبااااااااااااااااااااااااااااااااااااااااااااااااااااارك الله فيك على الدعوه الحلوة
والله والله لين عيوني دمعوا
احلى دعوه
بارك الله فيك يا رب

ام الحلوين كتب:

ان شاء الله تحملي وتجيبي وتفرحي بيه مش كان حملتي والا جبت معاش تخشي المنتدى وتعطينا اطباق حلوة ههههههههههههههههههه
ربي يناولك اللي في بالك يارب

بارك الله فيك يا رب ثاني دعوة نحصلها اليوم
بارك الله فيك
ولا يهمك بالعكس حنزيد نبدع وخاصه كان وحمي زي المرة الاولى مش قوي وبالعكس حبيت الماكله اكثر ههههههههههههههههههه
ويا ريتكم بحداي والله نجيبه لعندكم لكن الله غالب

** ahlam ** كتب:

سلمت يداك

اللله يسلمك حلومة

ولا يهمك ام الشيماء لانك اكيد ليك فتره خارج ليبيا هذا باش
وانشاء الله توا نقولك على اي حاجه تفوتك ههههههههههه
ويفوتك السو انشاء الله
مشكوره على مرورك يا غلا

ماشاء الله عليك طباخة صح سلم يدياتك السويسرول حنجربه في اقرب وقت

كلي أمل كتب:

ماشاء الله عليك طباخة صح سلم يدياتك السويسرول حنجربه في اقرب وقت

سلمها يا ربي خود بخاطرك
اجخلتيني
جربيه حبيبه وان شاء الله يعجبك

سارهمو جربتها الجزيره لكن صراحة مش حلوة يعنيييييييييييييييييي
مش عارفة شن انقول






تهبللللللللللللللللللللللللللللللللللللللللللللللللل جربوها والله حاجة رهيبة




تسلم ايديك

ماشاء الله ماشاء الله ام الحلوين والحلوات
تعرفي لما لقيتك كاتبه مش حلوة استغربت لان منظرها يهبل احلى حتى من اللي درتها انا
بعدين فهمتك يعطيك السلامه
صحتين على قلبك انتي والحلوين ربي يحفظهم

ماشاءالله عليك الطريقة جديدة انا السيسرول نعرفه امتاع العجينة اللي عدد البيض لازم يساوي عدد ملاعق الدقيق

مجربتها من زمان لكن توا انسيتها

لكن طريقتك جديدة اول مرة نشوفها والجزيرة خاطري انجربها لانها شكلها يسهفففففففففف

وماشاءالله علي ام الحلوين الشاطرة دارتها وجت تهبل

سلمك وتسلم ايديك

ام الحلوين كتب:

سارهمو جربتها الجزيره لكن صراحة مش حلوة يعنيييييييييييييييييي
مش عارفة شن انقول






تهبللللللللللللللللللللللللللللللللللللللللللللللللل جربوها والله حاجة رهيبة




تسلم ايديك

من وراى تطبق فى الاكلات

راك تقولى صاحبتى حامل وخارطرها فيها
ههههههههههههههههههههههه

ماشاء الله عليك

تسلم الايادى

مرام
وردة البستان
مشكورات على المرور
وجربوها وقوليلي



ام الشوش شفتي ام الحلوين
طلعت بتذاكر من وراك