شكلها العنصريه وصلت للمنتدي

وانا نقلب في المنتدي نلقي في اسماء شهداء مصراته الحبيبه بس الباقي وين؟

اليس من الاحري ياام الشيماء انك اتحطي شهداء ليبيا ككل وتبدي من اول شهيد والفيديو مش لازم ايكون من كل المدن ؟

والا زي مانشوفوا علي الفيس بوك والقنوات بداء يسير هنا ؟

اعتقد التهميش يجب ان لايطال لمدن ابيدت وهدمت ونكل بااهلها والمفقود فيها اكثر من الموجود ....

لااقصد من ثورة 17 فبراير بل منذو ارعه عقود

حق الوطن علينا ذكر كل شهداءه علي السواء والبدايه من البدايه ولمعلومات الجميع المستشهدين من المناطق الاخري في مصراته اكثر من اهلها

والحق ماينزعلش منه

ان شاء الله لا عنصرية ولا شئ احنا في ليبيا الجديدة
بس الاهتمام بمصراتة جاء من واقع عاشاته هذه المدينة والله يا مرام
ولد خالي عايش فيها ومتابع اخبارها من اول يوم وهذا وين رجع لاهله يحكي عليها شئ يشابه الخيال
يعني وحشية ما صارتش لو نحكيلك ما تصدقيش اخطر مما شفنا في القنوات
واكيد هذا ما يلغيش جهود الثوار في كل مدينة وقرية كلهم ولادنا وعلى العين والرأس واحني فخورين بيهم كلهم ربي يحفظهم وينصرهم في كل خطوة

معاك مرام في كلامك لا ننكر ان المناطق الشرقية هي من تحركت وفقدنا الكثير منهم سواء مفقودين او شهداء ..ومع ذلك هذا لا يمنع كل عضوة تكتب على شهداء مدينها ...اما مصـــــــــــــراتة..مصراتة الصمود عانت الكثير من محاصرة الكتائب
نحنا في الشرق الحمد لله تتحررت المدن مع بعضها في غضون ايام ..في درنه مثلا لم نرى مرتزقة في شوارعنا زي ما في البيضاء وشحات وبنغازي..
والحمد لله وعاشت ليبيا حررررررررة

والله أنشاء الله ما تصيرش العنصرية وكل بلدان ليبيا دفعت الثمن بس فيه مدن تضررت أكثر من الاخرى ودفعت شهداء



ولكن لانزايد على أحد



وشهدانا كلهم فى قلوبنا



لكن زى مصراتة والزاوية زالزنتان والجبل بصراحة لهم الصدارة



والله مازايد حد



وليبيا وحدة وطنية لاشرقية ولاغربية



ودم الشهيد غالى علينا اينما كان بلاده

لا شرقية لا غربيةو ليبيااااااااااااااااااااااا وحدة وطنية

اللي حكيتها انا شي واللي حكيتن انتن عليها شي اخر

مش من المفروض تبي تذكري شهداء تبدي من الاول وتستمري

ماهو للاسف انا نحكي من مكان عارفه اكثر مما احكي انا في مكان قريب من البحر وكنت نشوف في عويلتنا يركبوا في

في الجرافات ويمشوا لمصراته قدامي ومات منهم الكثير وهما من سكان مصراته وفي حتي الي ماعنده فيها حد

شهداء مصراته علي العين والراس بس تعرفوا كم عددهم 700 وشوية العدد هذا في يوم من الايام سقط 600 في يوم واحد

في احدي المدن

الزاوية اللي استشهدوا وين اساميهم؟

الشباب اللي انحرقوا احدا امعيتيقه وين اساميهم

انا مانحكيش علي حكيتوا عليه

كلامي في اتجاه اخر تماما اذا ذكرتي شهداء تذكري شهداء ليبيا كلها مش تنزلي شهداء علي اجزاء من مدينه وحده والباقي

بح

هذا قصدي ان شاءالله فهمتوه مرات نحس في روحي ندوي في وادي وحدي

اكيييييييييييييد فهمنا

هذا بالنسبالي واحنا خزت اصلا معمر هو الي فتنا الله لايسامحه لا دنيا لا اخرة

سلمها الشاطره

رايفت عليك يابيلا

شن اخبار ستار كابو مافيش اخبار عليها نتمناها ترجع للمنتدي هي واختها

فااااااااهمين يامرام ان كلنا قلوبنا على ليبيا... ولا ننسى شهدائنا فلولاهم ما كنا احرار اليوم

السلام عليكم

كيف حالكم يااخواتى والله حتى انا استحشتكم

وانت يامرمر نتك معفن وتلومى عليا هههههههههههههههههههههه توا يجى يوم ونتلاقو وتاخدى العصاء على راسك

توا نخش فى الموضوع طول

علاش نزلت مواضيع هلبا على مصراتة

انا كل يوم امى على نار من اختى احلام قعدنا فترة طويلة ماعندناش علم بيها حيا او ميتا

كل يوم انا نتابع فى اخبار مصراتة ونشوف فى الاسماء

اول ماصار الانقلاب انا قلبت المنتدى راس على عقب ونزلت اول شهداء بنغازى وامشو شوفو التاريخ يحكم على كلامى


وهذا اول موضوع

https://alshaima.yoo7.com/t5163-topic



وكانت الكاميرات ادجى عندنا فى الحوش وتصور وكنت نتكلم على كل شئ بحرية والله ماتفكرت اهلى بكل فى ليبيا

انهم لو شافونى فى التلفزيون او شافو راجلى انفكر فى بلادى وبس والله انقولكم فى الكام من قلبى بصدق




وبعدين ناضو مصراتة وبدى القدافى يدبح ويقتل وانقلبت البلاد على راسه

بديت انزل فى مواضيع على مصراتة

وبعدها خلاص معادش نعدل على المنتدى ولا عندى خلوق انى نفتح المنتدى بديت على الفيس بوك وخلاص

وتبو الحق ولا ولد عمه

اللى اضرر فى ليبيا كلها

من شهداء ومخطوفين ومغتصبيين وسرقو مصراتة وبعدبن الجبل
كاباو ونالوت ويفرن جادو وتيجى زنتان
اكيد مننسوش بنغازى يوم 16 ناضت للتورة

لكن حتى الجبل ناض يوم التورة لكن مفيش اخبار توصل اللى صاير عندهم والله

انا اللى نعرفه اكثر من اى وحدة كانت فى ليبيا اللى يبى يعرف شنو كان فى ليبيا اسئالو اللى فى تونس

انا امشيت الشهر اللى فات الى تونس وشوفت اللى ماشافه حد من مستشفيات تلقيهم كلهم مقصوصين الليدين

او منتهكات الاعراض او او او

ومرام انا منديرش العنصرية لانى تعرفين عايشة مع كل الجنسيات

يعنى ليبيا وحدة

وبالله عليكم بالله عليكم ونحلفكم الكلام هذا مش لازم منه فى المنتدى العنصرية الزايدة واللى يشوف حاجة على صاحبه يصلحها وخلاص

لان كلمة القدافى وفرخه سبف حال سوف نولد العنصرية وفتنة تصبح ليبيا فى قبلية



وانا فى بالى نبى اندير قسم ليبيا فقط ويكون فيه كل شئ



وسامحونى لو قصرت معاكم

انحبك فى الله

يسعدودى قريب نرحع لبلادى

الشهداء في كل مكان
وباعتباري نسكن في تاجوراء نحس في نص شباب تاجوراء ماتو شهداء من كتائب بوشفشوفه وضرب طيران النيتو لمدة 5 شهور الصواريخ إلا ملغم بيهم الطاغية المعسكرات الموجودة بتاجوراء

عشنا أيام سوداء ماتتمناها حتى لعدوك

حدث خير ان شاءالله بس مازلت انقول

توا تطلع الاحصائيات وتشوفوا الكلام اللي حكيته ....

وفعلا تاجوراء والزاوية اخبارها لاتخفي عن احد انا نحكي بمصداقيه لا اكثر لااقل

وانت ياحنه نكتبلك ع الياهو ماترديش خليك مستكردتينا علي راحتك ....كملي الحلويات والعرس بعدها افضيلي

تعرفن يابنات انا تعلمت العدوانية من الفيس بوك ان شاءالله مانقعد جالطه يستر الله

كيف حالك يامرام ؟؟ خيرك لا تنشدى ولادوري !! الباين تعلمتي حتى قلة النشدة من الفيس بوك مش غير العدوانية

وبعدين لوحي عليك الفيس بوك شني بديري بيه ذهاب شيرة ووجع رأس

المهم ........

ربي يرحم شهدائنا جميعا وين ماكانو

شهداء ليبيا اجرهم عند الله وان شاء الله فى عليين بجوار الرسول صلى الله عليه وسلم

وكل واحدة بتحكى من واقع بلادها

تمشى للزنتان يقولوا ثوار الزنتان تمشى للزاويا تسمعى احدات الزاوية تمشى مصراتة تسمعى اخبار مصراتة

وبصراحة معدورين والله اللى عانوه مش شوى خلى ياخدو وقتهم فى التعبير على اللى شوفوه وليبيا واحدة

مشكورة اختى هدا من حرصك والايام تتبت الابطال فى كل انحاء ليبيا الحبيبة