شن طبختى اليوم الموضوع الثانى

تذكير بمساهمة فاتح الموضوع :

السلام عليكم



اخواتى العزيزات شن رايكم كل وحدة تخش وتقول شن طيبت اليوم وهكى نستفيد من بعض
نستنى رايكم



أم مآب


غداي اليوم رشدة كسكاس

الحمدلله

ياريت يا ريت يا كلي امل تجي تتغدي عندي والله هذا يوم المنى ونحطك في عيوني ونديرلك كل لي تحبيه

لكن علاش ما تقوليلناش شن غداكم والا ما تتغدوش هههههههه من غدوى معش عندك عدر

بيلا يا حلوه بنقولك شن هو طاجين ابيض بشرط تشمري كمامك وديريه لانه ساهل هلبه باهي

خودي طاجين وحطي فيه يا حنه بصل مقرض شرايح وفوقه بطاطا شرايح وطماطم شرايح وفلفل اخضر باهي وبعدين حطي فوقهم الدجاج طبعا طروف متوسطه او زي ما تحبي وبعدين شوية ثومه مبشوره وصبي عليهم شوية زيت حكه وسمن راك تنسي السمن لانه يعطي في نكها حلوه وخودي طاسة ميه دافيه وحطي فيها شوية ملح وفلفل اسود وكسبر وكرويه ولو تحبي قرفه وخلطيها كويس وصبيها على الطاجين ورشي فوقهم زعتر باهي وياحلوه غطي الطاجين بالسلفر وطووووووووووول في الكوشه لين يطيب وحولي السلفر ولعي الكوشه من فوق بيش يتحمر الدجاج وامممممممممم طبعا اعزميني عليه هههههه وصنته تخليك تاكلي بدون شعور هههههههه وطبعا مش حلو تاكليه مصقع وخلاص

لو انتي مستعجله ديريله غلوه على الغاز قبل ما تحطيه في الكوشه

ونهارك لي دوري فيه كان ما ديريشي لين ايدي طاحت من الكتيبه

ههههههههههه

ياناري علي وخيتي تعبتها في حرة الكتيبة

ان شاء الله تو انديره ونعزمك عليه ياااااااريت والله انديرلك كل الحاجات الي نعرف انديره ههههههههههه

صحيتي حبوبة

احنا لتوا قاعد صبح ماتغدناش ههههههههههههه حتا الفطور مافطرتش ظميت وقعمزت طول ع نت هههههههههه

ههههههههههه لا اكيد نتغدو حبوبه
وغدانا فلفل محشي وارز وطبيخة فاصوليا
وطريقة الطاجين خذيتها توا انجربها

احني اليوم درنا طاجين ابيض

ماما وبابا متغديين برا الحوش لان عارفين المستشفي الزاوية ان معبي جرحي فاقاعدين غادي بما ان اتنين عندهم خبرة نوعا ما

وانا واختي ياحنة انا انقولها في طريقة ونحطو قاعد في الكوشة ماطابش ان شاء الله يجي حلو

تي وينك يا بيلا قاعد لي تواء ماطابش ههههههههه مش قلتي بتعزميني شن هالقفاصه

غير قوليلي شني عجبك والا لوحتوه وتغديتوا سندزتشات ههههههههههه ان شاء الله غير ادعتيلي مش دعيتي عليا هههههه

كلي امل ان شاء الله نتلاقوا ونتغدوا مع بعض

اني اليوم درت شربه بيضاء وطاجين جبن

صحة غداكم

حبوبة فكرتينى فيه الطاجين الابيض ليا هلبة مدرتاش لكن غدوة بنديره ان شاء الله فكيتينى في التفكير في الغدى ههههههههههههههه

انى اليوم درت بكبوكى وعجة

صحتين يا ام ايوب باهي انتي فتكيتي من التفكير في الغدي واني هيا فكريلي ما دخليش فيك غدوى الصبح اتصلي بيا وقوليلي شن اندير باهي يا غزاله

لا الحقجانا اقنين والله تم حتا اماليا ماقعدتش منه احني درنا شوية خفنا يجينا مش حلو ولا حاجة بس تم كله هههههههه

صحتين غداكم

المرة الجاية حبوبة هههههههههههه

انى اليوم درت الطاجين الابيض ودرت معاه رز بلاو فرحانة اليوم مفتكية من التفكير طيبت بكرى

حبوبة فكرتلك شنى اتطيبي ديرى عصبان ورشدة كسكاس وامبطن وبوريك انظنى ياسر فيكم كان شوية انزيد نقولك شنى اتديري معاهم

احنا رز بالخلطة

صحتين غدواتكم

صحة صحة



انا كيف ماتعرفو راجلى مسافر مرتتتتتتتتتاااااااااااحة من التطيب حاجة خفيفة لصغيويرتى

اليوم صدر دجاجة شويته معاه بطاطا

بيلا باهي لي عجبك الطاجين هههههههه مش مشكله نستنى عزومتك المره الجايه مع اني عارفتك بتفوتيني لكن انطمن في روحي

ام ايوب شكرا على التفكير هذه اخر مره نطلب منك تفكريلي شن انطيب في حياتي علاش ترعشي فيا العفوووووووووو

فكرة بروحي الحمد لله تفكيري على قدي هههههههههههه درت طبيخة بازيليا

خاطرى فى عصبان

قرب العيد وانتم تاكلو وانا انشم
ان شاء الله العام الجاى نهيج عندكم

ان شاء الله

ههههههههههههه

صحة غداكم
نحن رز امبوخ

صحة غداكم

انى اليوم درت كسكسى بالبصلة

حبوبة اماله علاش تقوليلى فكريلي بعد مش قد الديران

ام شوشو ولاتزعلى هانت خلاص اول ما تجى الى ليبيا ان شاء الله بنشبعوك في العصبان وخصوصا المصارين

اني اليوم درت وجبة (حوت مقلي وطاجين حوت ) ومعاهم رز وسلاطه مشويه وسلاطة بابا غنوج وخبيزه وطبعا تشبس

هذه اول مره انطيب فيها حوت في حياتي لاني ما نحباش ومانتحملش صنته وقلت خلي نغصب على روحي قداش بنحرم الراجل منه وتغدى عندي اوخيي الغالي وعجبه هو وراجلي هلبه وقالولي معش بنرحموك فيه وخوي قالي كان تبيني نتغدى عندك في الجديد يا حوت يا معش بنجي نتغدى بكل شفتوا العمله

ام ايوب معليشي معش بنقولك فكريلي بكل هيا مره وغلطه خلي نعصر دماغي بروحي خير

ام شوشو خلاص قررررررررررربت وتشبعي في العصبان

صحة الحوت لخوى وولد عمى

حبوبة اول ما قريت انك كاتبة غداي حوت انصدمت قلت هده كيف دراته وهيا قبل لما تشم صنته اتدرهنا في كبدنا ووووووووووووه افى ووووووووووه افي

انى اليوم درت رز بالبصلة وطاجين جبن ومخدة الباشا وسلاطة عربية

اني اليوم راجلي متغدي بره درت بكبوكي لي الصغار وخلاص

ام ايوب يعلم الله بيا كيف طيبته واني مصاريني قريب حطيتهم لكن خوك بسلامته قالي عادي كان نضفتي بطنك في سبيل ناكلوا الحوت

صحة غداكم
ام ايوب هههههههههههه شنو مخدة الباشا قوليلنا عليها

صحة غداكم انى اليوم درت دجاج محمر وبطاطا مقلية وسلاطة مشوية

السلام عليكم
كلى امل اتدللي هده طريقتها مخدة الباشا جربيها راهى حلوة تهبل


اولا تاخدى الدجاج وتقطيعه الى مكعبات
صغيرة او قطع صغيرة تم تغسليه جيدا وتضعيه في سفاى الخضرة لين تنزل كل
المية تم تاخديه وتحطيه في صونية وتبشرى عليه بصل وتضيفيله ملح وفلفل اكحل
وحرارات وقطرات ليم وملعقة خل وتغطيه وتتركيه يتتبل اقل حاجة لمدة نص ساعة
او اكتر
تم تاخدية الجاج وتحطيه في طنجرة وتحطيه على النار وتخليه على
نار هادئة لين ينشف من اميته ويطيب الدجاج
طريق الورق
كوب حليب
وتلاتة بيضات وملعقة زيت ونص ملعقة صغيرة خميرة كيكة وقليل من الملح وفلفل
اكحل وتمانية ملاعق كبيرة دقيق وتضرب جيدا تم تحليها على طاجين تيفان بنفس
طريق الكانلونى او البنكيك اى على شكل دوائر
تم تاخدى كل دائرة وتحطى
في المنتصف ملعقة من الدجاج تم تسكريها من الاربعة جيهات يعنى الحشوة في
المنتصف وتجيبى الجوانب الى المنتصف الى ان يصبح شكلها مربع يعنى نفس شكل
المخدة ههههههههه طبعا كان مباش الورق يلصق ويتسكر زين ممكن تدهنى الحواشى بدحي او
تخلطى شوية دقيق وميه وتلصقي بيها وتاخدي صفرة ترشى فيها دقيق وكل طرف
تسكريه تحطيه في الصفرة وتكون الجيهة اللى مسكرتيه من تحت من جيهة الدقيق
وبعد ما تكملى المقدار كله حطى الصفرة في الفريز وخليها لمدة تلت ساعة او نص
ساعة لين تحسيها تماسكت وتسكرت معاش تنفتح من بعض وبعدين ابدى غلفي في
الدحى وبعدين في الخبزة المرحية واقليها في الزيت يكون الزيت مرتفع شوية
ويكون ساخن
وبعد ما تكملى القلى ما تغطيهاش بيش ما ترتخاش ستفيها في
طاجين وحطى عيها جبنة مبشورة او جبنة شرائح حسب ما تحبى وحطى عليها زيتون
شرائح ودخليها للكوشة حتى تسيح الجبنة
وان شاء الله انكون شرحتلك
طريقتها كويس يا كلى امل جربيها حلوة شكلها وطعمتها انى صراحة انحبها وديمة
انديرى فيها
واى استفسار انى موجودة
واول ما نديرها مرة تانية تو انصورها ونزلك صورتها بيش تعرفي شكلها كيف يجى

ايدى
وجعتنى من الكتيبة ان شاء الله غير اتديريها
كان معرفتيهاش كيف اسالي عادى تو انزيد انوضحلك
سلامات

اسسفة معاد خشيت بس انتم عارفين ماشي والجاي ههههههه والحمد لله

احنا امس لازانيا وبيتزا وشورمة بوريك

وصحتين غداكم ...

اني اليوم فطرنا موخر وفتنا الغدي والعشيه طلعت نشري في حوايج لصغاري واحني مروحين خدينا دجاجه محمره ومحشيه بالرز ومشي الحال

الحمد لله على النعمه