الحلقة الخامسة من مسلسل ريما.....

الحلقة الخامس
كانت ريما تتكلم فى التلفون مع ندى صاحبتها المقربة
اتخيلي والله انصدمت معقولة سلوى اللى دمها زي البلكة تنخطب!! وخاطري نعرف
من هو طايح السعد اللي خذاها؟!! تي ايه بالله شكلنا حق قعدنا زي نعجات
حمد!! قعدنا وماد...ورنا حد !!ههههههههه وكان طلع كلام امى لمرة خالى صح
معناها انتي اللي قعدتي بروحك واني طلعت منها.. )
وهي قاعدة تتكلم سمعت صوت خطوات زبطتها مشية امها وقالت لصاحبتها باي توا بنسكر امي جاية تو اتديرلي مردح على شدان التلفون )
فتحت الام الباب بالشوية وماهبداتاش هبد زي عوايدها وشبحت لريما اللي سكرت
موبايلها ودارت روحها تطبق في حوايجها المشرتعات في كل تركينة وكلمتها
قائلة خيرك مقعمزة بروحك؟؟ نبيك بنهدرز معاك شوية)
وقعمزت الام على حاشية السرير وخلت ريما الحوايج من ايدها وقعمزت جنب امها مستغربة وخاطرها تعرف شن حتهذرز معاها امها؟؟
قالت الام شفتي مرة خالك المسمومة شن قالت اليوم؟؟ والله قريب درت فيها جريمة ..من بكري نغلى عليها وكلامها قاعد يشرين في وداني )
ردت ريما
حتى اني كسرتلي رقبتي..الصراحة ياماما عندها صحة وجه مرة خوك عمري ماشفتها
..وكله كوم وبنتها المسمومة كوم تاني اه وكان يطلقوني عليها بس..خاطري
نعرف خيرهم عليا هي وامها راسهم وراسي !! لكن انتي قديتيها ياماما حرقتيلها
دمها شفتيها لين خليقتها انقلبت من كلامك )
قالت الام : ( لكن والله مابردت على قلبي..انتي ماتعرفيهاش نادية هادي
كيف..تي هاذي واحدة ماتتحشمش وماتخافش ربي..وحقودة ومحسدية..وكلامها خوفني
..و مدام حاطاتك في راسها معناها نتوقع اتدير اي حاجة)
قاطعتها ريما ماعندها ماتدير ..وما اعتقدش توصل بيها للدرجة هادي..وكان بتقطعنا احسن نفتكو منها )
كملت الام
تي كان غيربتقطعنا بس باهي هي من امتى تواصل فينا؟؟ تي هي حتى امى تمشيلها
قريب من العام للعام ..اني خايفة من حاجات تانية..غير انتى صغيرة
وماتعرفيش..هاذي تستعقد بالكتيبة والشيوخ والحاجات هادي..شوفيها انتي كيف
داهبة شيرة خوي سالم؟؟ من قال سالم اللي كلنا نحسبوله في الف حساب يولي زي
الطرطور في جرتها وكل شي الكلمة كلمتها والشيرة شيرتها ..صدقيني هادي ممكن
اتدير اي حاجة واتوقعي حتى تبلى عليك بدوة فارغة !!! حسبي الله ونعم الوكيل
فيها وخلاص )
ردت ريما
ماتخافيش ياماما انتي راهو عاطيتيها اكبر من حجمها..ومانحسش فيها حتدير شي
شوفيها كيف روحت مصموتة وتو تلهى في فرختها وخطبتها وتنسانا )
قالت الام فكينا من مرة خالك وخلينا في المهم)
فلتت ريما عيونها وركزت بكل حواسها بش تعرف امها شن بتقول ..وكملت الام كلامها
اكيد سمعتيني قلت لمرة خالك على العريس اللي جايك ؟ وطبعا الدوة هادي
مافيش منها..غير من القهرة قلتهلها هكي ..لكن توا نبيك تنشطي ذقنك وتسمعي
كلامي بالك يجيك عريس حق ونفتكوا من نادية وشرها )
ارتسمت نظرة خيبة على وجه ريما وقالت لامها اني ديمة نسمع في كلامك ياماما؟ والعريس شن بنجيبه بالسيف ولا اني اللي بنخطبه!! وبعدين اني قاعدة نقرا )
قالت الام
وين بالله تسمعي في كلامي؟؟ صح هي الماخذة نصيب لكن النصيب اعمى ويبي من
يقوده ..ولازم تنشطي روحك وتولى فالحة وتديري اللي نقولك عليه..ولما يجوني
نساوين تقعمزي وتهدرزي مش تسلمي وتلبدي في دارك ..وتمشي معاي للاعراس خلى
يشوفوك الناس مش يا مقعمزة في الحوش ياتنسرفي في الجامعة لين انصهدتي
وحرقاتك الشمس)
ردت ريما تي شن انسرف ياماما؟؟ حرام عليك اني نمشي للجامعة نقرا ونحضر في محاضرات !! و)
قاطعتها الام
تي باهي ياستي تقري..المهم غدوة جايتنا نجاة مرة عمك..وهادي عندها اولاد
خوتها ماشاء الله عليهم ونبيك تلبسي قفطان ولاقونة مش سروال زي العزري
وسشوري قصتك مش تلبسي كارونة وتطلعي جبهتك زي الصلعة وديري شوية احمرخدود
بش يجري في وجهك الدم مش تطلعي صفرا زي الليمة القارصة..وطبعا مانوصيكش
نبيك زي الطقاشة تنوضي بروحك تجيبي العصير وبعده الشاهي من غير مانقعد ننخص
ونفنص فيك افهمي بروحك ونوضي..وقعمزي وهذرزي بحدانا وردي بالك تضحكي ضحكة
المستهترات اللي تضحكي فيها..وكان نشبحك تمضغي في المستكة بحدانا انمزقلك
فمك..مرة عمك عيلتهم زمنيين هلبة ونبيك ترفعيلي راسك بحداها ..وماتندريش
مرات تصدف معاك وتزهى في عين مرة عمك..)
ردت ريما امالا بضاعة اني بتتفرج عليا؟؟ تقول هي اصلا جاية بتخطب؟؟ وبعدين اني مانبيش ناخذ بالطريقة هادي )
قاطعتها امها
والله؟؟ امالا باما طريقة عابية بتاخذي يا للا؟؟ على اساس الطرق التانية
جايبتلك العرسان طوابير؟؟ هني روحك سلم بنتي واسمعي كلامي وماتحرقيليش دمي
اكتر ما هو محروق )
ردت ريما والدوة مش عاجبتها : ( تي باهي تو ندير زي ماتبي ونشوفوا العرسان اللي بيجوني )
وناضت الام من السرير وقالت لريما نوضي سلم بنتي ضمي دارك وهي رايحة زي الزريبة..مرات بنات عمك يخشو معاك وطلعي شن بتلبسي وجيبيلي اللبسة نشوفها )
وطلعت الام من الدار..واطلقت العنان لصوتها وهي تنادي على مروة
مرووووووووووووووووووووووووة..تعالى ضمي المطبخ ..ولا والله نجي نمزقلك
كتاباتك على اساس القراية مقطعة بعضها وكان نجي نشوفك نلقاك تميعدي في
التلفون )
واكملت الصياح على معاذ لما شافته طالع من الكوجينة
هذا فاش فالح طالع خاش على الكوجينة تاكل وخلاص قريب تاكلني حتى اني..تي
والله مازال اتدير الهبال اللي درته اليوم مع الصغار نهارك اللي تدور
فيه..بدل ماتعقلهم؟؟ تزيد تهبل فيهم معاك؟؟ لما انت تمشيلهم في حوشهم يطلعو
فيك تلعب في الشارع بش ماتمسش العابهم..وانت اللي هناك طلعته توري في
فلاحتك..تي والله مازاد تعاودها البلايستشين متاعك الا مانعطيه وانت اقعد
هكي..مش خرجك انت البلايستاشن والالعاب)
وقعمزت الام وشدت التلفون الارضي تكلم في واحدة من خواتها تحكيلها في اللى
داراته مرة خوها اليوم..وكل ماتتفكر تزيد تغلى وتنفعل اكتر..وماهونش عليها
الا فكرة ان سلفتها نجاة تعجبها ريما وتجيبلها ولد خوها وتنخطب ريما وتفتك
من نادية وكلامها..وكان التفكير يرفع ويجيب فيها زعما نجاة اللي ديمة تقول
عليها لفعة جيتها تجي بفايدة؟؟ ولا احرف من جية المسمومة نادية؟؟
يتبع في الحلقة القادمة.اتمنا لكم متابعه شيقه.

هههههههههههههههههه يا والله عليك ريما ما بعدها ههههههههههه ان شاء الله ربي ايجيبلها النصيب الباهي وبلكي كلام أمها ايجيب نتيجة

اقري باهي حلم حتى انتى كلام أم ريما النصيب يبي من يقوده ههههههههههههههههههههههه

الله يسلمك أم أوبه هكي تمام كل يوم حلقه سلمها يارب اللى تجبر في الخواطر الحلقة الخامسة من مسلسل ريما..... 81527

هههههههههههههههه انشاله خير تو نهدرز اني وياك عالخاص ونحكيلك هههههههههههههههههههه سر بيناتنا علي قولة النصيب انشاله خير الحلقة الخامسة من مسلسل ريما..... 477185