وين الجلسة العائلية ؟؟؟؟

موضوع: وين الجلسة العائلية ؟؟؟؟ 2010-11-09, 02:20

السلام عليكم
وين الجلسة العائلية ؟؟؟؟ 761900

أخواتى العزيزات اليوم نبى نطرح موضوع أجتماعى شبه أنقرض من لبيوت الليبية

وهو

وين الجلسة العائلية متاع العشية بجنب العالة الليبية

وين الجلسة العائلية ؟؟؟؟ 1238887397

كان البيت الليبيى فىالعشية والليل يجلسوا جلسة عائلية فيها الاب والام والاولاد

والعالة قدامهم

وكانت العالة عروس اللمة بهضاك طويسة الشاهى والكعك واللوز والكاكاوية

وحولها يجتمع العيلة للهدرزة والسهر وتمضية الوقت الطيب

تواء وين هدا كله ؟؟؟؟؟؟؟؟؟

الاب أما مشغول أو فى داره يتفرج على التلفزيون

الام حايسة فى هضاك الحوش

الاولاد اللى مقعمز على الكمبيوتر واللى على البستيشن واللى على التلفزيون واللى ................ واللى .............. الخ

عالم حايس

راحت اللمة والعالة الليبية وطويسة الشاهى باللوز يا حسرة

بالله عليكم تخشوا وتقولوا شن رايكم فى ها التغير

وين الجلسة العائلية ؟؟؟؟ 761900

مع أجمل تحياتى

معك حق يا أم ماب

لكن الحياة تغيرت والشغل زاد سواء على الرجل خارج المنزل أو على المرأة داخل المنزل وبزيادة قد تعمل المراة في الخارج أيضا...

لكن هذا لايمنع من ان الأسرة التي تريد أن تحافظ على عاداتها قادرة على ذلك, ولو بأن يتفقوا على يوم في الأسبوع حتى أعتقد يكفي لو كانت جلسة حلوة مليئة بالحب والصراحة وكل واحد يحكي ما مر به خلال الأسبوع

لي عودة بإذن الله يا ام أيوب......

حلو موضوعك ام ماب
عندك الحق
وتقعميزت العالة تغيرت بدت مع الاجهزة وكل واحد حاط سماعة في ودنا وماعاد يسمع في حد
لاحول ولاقوة الا بالله

لي عودة

صدقتي ام ماءب ولت عاده قديمه اول شيء الراجل بدي ديما مشغول وطالع برا الحوش اعطيه طاسة القهوه والا شاي خفيف بسرعه ويتوكل على حاله والام لو كانت تشتغل في النهار تلقاها ياروحي اتحوس في هذاك الحوش بتلحقي اضم اللى قاعد والصغار زي ماقلتي ياتلفزيون ياكمبيوتر ياموبايل والاولاد ديما في الشارع منه الشاب اللى بيقعدلك العشيه في الحوش

لكن بالنسبه لينا احنى عالة الشاي فى حوش جدي نلقوها عندي خالتي ماشاء الله عليها اول مانخشوا تفرح وتنصب هذيك العاله ونهدرزو عليها وماشاء الله ادير في جو سمح

يسلمو على الموضوع وياريت ايام زمان ترجع ولمة ومحبة الناس لبعضها توا كل واحد يجري ورا هالدنيا وربي يهديهم ويساعدهم

مروركم أسعدنى

مشكورين على التفاعل مع الموضوع

تي فرقة الحال الاب بروحه مقعمز على الكمبيوتر ولا يدور في الشارع ولا في القهاوي
والام تتفرج على التفلزيون ولا تنسرف في السوق ولا عند اماليها
ومافي حد يدري على حد كلهم واخذين وجهم
وربي يهدي من خلق
الحمد لله الا لحقنا وشفنا اللمه مع امالينا وهداك الشاهي واللوز والكاكاوبة وفي الشتاء هداك القصدل الحمد لله
منورة ام مآب موضوعك قيم رووووووووووعه

هييييييييييييه وين العالة وين ايامها تو الواحد يجري ليل انهار على لقمة عيشه ومش ملحق
ياريت غير نلتموا حتى بلا عالة الراجل يرفعه الضئ ويجيبه الضلام والمرآة حارقة دمها مع اصغار
حتى لما تفضى تجي قدام التلفاز والا الكمبيوتر ومعاش تندري على الدنيا شن فيها
والله العالة ما نعرفها غير لما نمشي لحوش اهلي وتكون مرة خوي عندهم تحب العالة هلبة
تقول تعز عليا اللمة والهدرزة على العالة
مشكورة حبيبة على الموضوع

تراه من فيكم عمرها دارت عالة ولمت صغارها وراجلها
أني لوله زمان كنت اندير فيها وبعدها سيبتها
العاله تبي اللمه والعيلة
والحمد لله

منين كانت عزوزتى حية الله يرحمها كنت ندير فيها مرة مرة

ومن لما توفت والله تقول أندفنت معاها
الوقت تغير حتى أنديرها ماهو مقعمز بحداها واحد كل واحد على حاله

ربى يهدى ويغير الحال الى أفضل

مشكورين على التفاعل أمان ودنيا المحبةو كل من مر

يا حسرة على شاهى العالة انى ديمة نقول كان راجلى يحب الشاهى راهو انديرها لانها في الشتى حلوة حطتها ولمة العيلة عليها لكن انى راجلى ميشربش فيه الشاهي بكل
مرات نولع في الكانون ونقلى عليه في الكاكاوية للصغار وراجلى نديرله عليه في قهوة نصنع في جو العالة
انى امى ديمة في الشتى تحب اتدير الشاهى على الكانون هيا وبوي لما نمشيلهم صغاري يبدو يقولولها هيا ديريلنا شاهى وكاكاوية وكل يوم العشية بنحطوها العالة
وبوى بيجيب لوز او كاكاوية
وياريت يولو ايام زمان

مشكورة ام ماب خليتينى نسترجعو في الدكريات

اااااااااااااااااااااخ قطعتولى قلبى بالكاكاوية والكانون والعالة
ليا زماااااااااااااان ماشفتها العالة
فى مرة جت عندى صاحبتى وكانو عندنا رجالة صحاب راجلى خطرت على بالنا شاهى بالعالة قعدنا انديرو فى الرغوة متاع الشاعة بالبكرج القهوة لعند مادرنا 5 طاوسى طلعت روحنا يااااااااااااااه فكرتونى بزمان
انا نحب نجمع صغارى بعد الغدى لازم راجلى يشرب قهوى اندير لصغارى مية وانا وراجلى قهوة ونقعمزة وتختم على طريحة ياخدوها الصغار هههههههههههههههه
وندخل نرقدهم وانا نقلب وجهى على النت والراجلى يتكى ولا يتفرج على التلفزيون ولا يمشى لجامع
فعلا مافيش لمة العيلة
ربى يهدى

ياررررررررب نلم مع اهلى وندير العالة

انا ان شاءالله نبي انديرها ياام ماب في حوشي الجديد ههههههههههههههههه

بصراحة فيها جو فقدناه لكن ان شاءالله نحصلها

تعرفي نذكر ان اول مابدوا يحولوا فيها الناس كان بس البريمس الغاز هو المحول وباقي العاله قاعده ع اساس

ان انطيبوه ع غاز المطبخ بس بعدها لحقتها باقي العاله

والنادر والمضحك زمان اللي ادير في الشاهي هي عروس القعده لازم تكون موجودة توا يعزقوها برا الدار امتاع

المقعد هي وعالتها وهنا يهدرزن جوا وكانها العاله تبي تشوه القعده انا حالفة اني نديرها وان شاءالله نصورها

لكم وبالنسبة لام الشيماء الحال من بعضه حتي انا نقعمز علي بكرج القهوة وتختم بضربه العيال من الشطانه

ام ماب موضوعك حلو ويستاهل الهدرزة عليه بطويسة شاهي ولوز

انشاء الله قريب يا أم الشيماء

تنزلي ليبيا وتلقي حبايبك واشربي شاي لما تقولي خلاص ههههههه

ماشاء الله عليكي يا مرلم ننتظر عزومتك على الشاي أول ما تشتريها

هههههههه

وين الجلسة العائلية ؟؟؟؟ 589163

ان شاءالله يامها انزلكم الصور وانتوا هدرزوا علي الصور ههههههههههههههه

ربى يقبل منكم دعوتكم ان شاء الله وام ماب انسيت ماقلتلكش موضوع تحفة رهيبة والله وعلى قولة مرام البيان تكمل الجلسة بطاسة شاهى

تي حتى الماكلة الطايبة كل واحد وصفرته وصونيته لا بال تبو العاله واللمه
بالله الله يرحم جدودنا وخلاص
خلوني ساكتة

مشكورين على المرور وتفاعلكم مع الموضوع

بس الصورمش عا رفة خيرهم مانزلوش يا ام شوشو
لما درت أرسال طاروا

انشاء الله مرام نشوفوا عالتك الجديدةو انشاء الله يا ام شوشو تجى ليبيا وتشربى شاهى العالةمع أهلك وأحبابك

ضحكتيني امان
تقولك خلوني ساكتة وخلاص

عندك الحق اجتماع الاسر توا بدا شي عزيز
بالذات لما الصغار يبدوا يكبروا
كل واحد ليه اهتمامات مختلفة الولد يلعب الكورة او في السايبر
والبنت على الكمبيوتر او التلفزيون اومع اصحابها بالموبايل

التكنولوجيا على قد ماهي مهمةومفيدة على الطرف الاخر فهي ضارة من عدة اوجه وتفكيك الاسرة احد هذه الاوجه
ولاحول ولا قوة الا بالله

وأنا اوكد ان التكنولوجيا هى المسؤلة الاولى على التفكك الاسرى وعدم الترابط

لكن التكونولوجيا ليها فوائد كثيرة في جمع الاسر زي ماصاير توا في المغتربين لو مافيش كمبيوتر ونت وموبايل ماكنش في ارتباط بهم صح كل تقدم سلاح ذو حدين ياما نافع ياما ضار حسب التوعية وطريقة الاستخدام

صح معك حق يا سناء

التقدم التقني سيف له حدين

بارك الله فيكن

» كيف تديران الازمات العائلية
» البطاقة العائلية لأسرة الرسول محمد صلى الله عليه وسلم